Gæðin einkenna íslenskar sjávarafurðir

Engin áberandi íslensk vörumerki eru á franska markaðnum fyrir fiskafurðir, en almennt má segja um franska markaðinn að þar séu mjög fá sterk vörumerki fyrir sjávarafurðir. Franskir neytendur eru einnig mjög ómeðvitaðir um hvaðan fiskurinn sem þeir borða á uppruna sinn. Margir telja fiskinn vera frá Frakklandi en einnig nefna margir Noreg.

Vörumerkið NORGE er það vörumerki sem er hvað mest áberandi á franska markaðnum en einnig má nefna Pavillon France. Norðmenn hafa m.a. notað myndbönd, samfélagsmiðla, plaköt og kynningaefni á matseðlum og sýndi Marie Christine dæmi um slíkt á fundinum.

Þetta kom fram á kynningarfundi sem Íslandsstofa stóð fyrir um franska markaðinn fyrir sjávarafurðir. Fundurinn fór fram í Víkinni sjóminjasafni og var ágætlega sóttur af fulltrúum framleiðenda, sölufyrirtækja o.fl.

Marie Christine Monfort, sem hefur meira en 20 ára reynslu af ráðgjöf í markaðssetningu sjávarafurða, fór m.a. yfir einkenni franska markaðarins, kröfur neytenda, helstu vörumerki og einkenni smásölumarkaðarins auk þessa að gera grein fyrir markaðs- og kynningarstarfi á franska markaðnum. Í lok fundarins fóru fram opnar umræður um hvaða tækifæri íslenskar sjávarafurðir eiga á franska markaðnum.

Í erindi Marie Christine kom fram að stöðugleiki einkennir franska markaðinn. Um 90% af þeim sjávarafurðum sem eru á markaðnum eru innfluttar en hlutfall Íslendinga á markaðnum er um 5% þegar horft er til verðmætis innflutnings. Þá eru Íslendingar stærstir á Frakklandsmarkaðnum þegar kemur að ferskum þorskflökum.

Í lok fundarins var komið aðeins inn á tækifæri Íslendinga á markaðnum. Þar gerði Marie Christine gestum fundarins ljóst að Íslendingar myndu aldrei geta beitt sömu aðferðum og Norðmenn í kynningarstarfi á franska markaðnum frekar en á öðrum mörkuðum. Þar yrðu Íslendingar að fara aðrar leiðir, vera klókari varðandi nýtingu fjármagns og umfram allt  leggja áherslu á gæðin sem einkenna íslenskar sjávarafurðir. Áherslan á að vera á neytendur sem borga meira fyrir hágæða vöru.

Meðfylgjandi mynd frá fundinum er fengin hjá Íslandsstofu.