Gullkarfa ceviche

Karfi er í vaxandi mæli á matseðli okkar Íslendinga. Þetta er mjög góður matfiskur með nokkuð sérstakt bragð og hann fæst alltaf í fiskbúðum landsins. Við leituðum að þessu sinni eftir góðri uppskrift inn á uppskriftasíðu Norðanfisks, fiskurimatinn.is en þar er að finna mikið af góðum uppskriftum.

Höfundur þessarar uppskriftar sem er forréttur fyrir fjóra er Arnbjörn Arason eða Addi eins og hann er kallaður. Hann starfar sem matráður í mötuneyti HB Granda við Norðurgarð í Reykjavík. Þar eldar hann hádegismat fyrir um 200 starfsmenn alla virka daga. Í hverri viku er ferskur gullkarfi í matinn og má því segja að Addi sé reynslumikill í eldun á gullkarfa.

Innihald:

  • 200 g gullkarfi
  • 50 g humarhalar
  • Safi úr 2–3 límónum (lime)
  • ¼  rauð paprika, fínsöxuð
  • ¼  rauðlaukur, grófsaxaður
  • 2 cm grænn chili, fínsaxaður
  • ½ -1 hvítlauksgeiri, fínsaxaður
  • ½  tómatur, afhýddur án kjarna og grófsaxaður
  • 1 tsk kóríander, fínsaxaður (geymið hluta til skreytingar í lokin)
  • 1 msk ólífuolía
  • ½  msk hvítvínsedik
  • Salt og svartur pipar

Aðferð:

Skerið gullkarfann í ræmur eða ferninga 3×3 cm. Raðið fisknum í ílát, grunnt fat eða skál, og hellið límónusafanum yfir þannig að fljóti yfir fiskinn. Bætið humrinum við. Lokið ílátinu og setjið í kæli í 4–5 klukkustundir. Veltið við annað slagið af varfærni. Þegar tíminn er liðinn hefur límónuvökvinn lokið hlutverki sínu og við blasir þéttur, hvítur og stinnur fiskurinn. Hellið vökvanum af.

Skerið papriku, lauk, chili, hvítlauk, kóríander (munið að geyma hluta af kóríandernum í skreytingu) og tómata og setjið í skál. Blandið síðan olíu, ediki og kryddi saman við og hellið yfir fiskinn. Blandið vel saman og setjið í kæli í sólarhring eða svo.

Stundarfjórðungi áður en rétturinn er borinn fram er fiskurinn tekinn úr kælinum og látinn standa við stofuhita. Rífið kóríander yfir fiskinn og malið ögn af svörtum pipar. Berið réttinn fram á litlum diskum eða staupum fyrir hvern og einn með humarhalana efst.

 

Tengdar færslur

thumbnail
hover

Ræða sameiningu Vísis og Þorbjarnar

Eigendur sjávarútvegsfyrirtækjanna Vísis hf. og Þorbjarnar hf. hafa hafið viðræður um að leggja eignir félaganna inn í nýtt fyr...

thumbnail
hover

Fer í draumafríið um jólin

Maður vikunnar að þessu sinni er borinn og barnfæddur Dalvíkingur. Fyrsta launaseðilinn fékk fyrir útskipun á rækju hjá Söltunar...

thumbnail
hover

Bergey orðin blá

Bergey VE hefur verið seld Guðmundi Runólfssyni hf. í Grundarfirði og verður skipið afhent hinum nýja eiganda á næstu dögum og mu...