Meðafli af teistu umreiknaður út frá 1% veiðiferða

Landssamband smábátaeigenda gagnrýnir aðferðir Hafrannsóknastofnunar við uppreikning á meðafla við grásleppuveiðar. Sambandið bendir á að meðafli af teistu sé uppreiknaður út frá 1% veiðiferða og segir að ekki sé tekið tillit til mismunandi aðstæðna eftir svæðum og dýpi. Skýrsla Hafró um meðafla við grásleppuveiðar leiddi til þess að umhverfisvottun á veiðunum var felld úr gildi.

Kristján Þór Júlíusson sjávarútvegs- og landbúnaðarráðherra fundaði með LS, fulltrúum MSC, Hafrannsóknastofnun og Fiskistofu sl. miðvikudag.  Tilefnið var tilkynning Tún ehf um afturköllun MSC vottunar grásleppuveiða þann 4. janúar sl.  Útselur, landselur og teista sem meðafli við veiðarnar hefðu fellt hana, fjöldi þessara tegunda fór yfir þau mörk sem staðall MSC heimilar.

Í upphafi bað ráðherra fundarmenn að kynna sjónarmið sín og hafa hugfast að þó þeir væru ósammála væri farsælast til árangurs að koma sér saman um aðgerðaráætlun.

Á fundinum var farið yfir stöðu mála útfrá sjónarmiðum hvers og eins.  Fulltrúi MSC kynnti aðferðafræði samtakana við vottun, Hafrannsóknastofnun útskýrði skýrslu sína sem varð til þess að vottunin féll og LS greindi frá því hvers vegna félagið krefðist þess að skýrsla Hafrannsóknastofnunar yrði dregin til baka og rangfærslur og útreikningar leiðréttir.

Gagnrýni LS snýr helst að uppreikningi Hafrannsóknastofnunar á meðafla úr skýrslum veiðieftirlitsmanna Fiskistofu.  Þar skorti á að tekið væri tillit til útbreiðslu dýra, tímabils sem mælingar fóru fram á, dýpi á veiðislóð og fjölda leyfa á hverju svæði.

Sambandið skýrir á heimasíðu sinni a hverju gagnrýni þess á mat á teistu sem meðafla er byggð:

„Alls var unnið úr 115 skýrslum veiðieftirlitsmanna Fiskistofu á árunum 2014 – 2016.  Alls veiddust í þeim 307 fuglar, þar af 71 teista.

Útreikningar Hafrannsóknastofnunar gerðu ráð fyrir að sami fjöldi væri veiddur í þeim sjóferðum sem ekki hefði verið mælt úr, þrátt fyrir að úrtakið hefði aðeins verið um 1%.  Þá væri alfarið horft fram hjá því að teista kæmi aðeins í net sem lögð eru grynnra en 15 metrar, en 80% grásleppuneta væru lögð dýpra og ættu því ekki að koma til greina við útreikninga.

Einnig er rétt að benda á að við fyrstu mælingu á teistu sem meðafla 2014, voru uppreiknaðar 3.568 teistur út frá 44 teistum. 2016 tölurnar sem fella teistuna eru 998, uppreiknaðar frá 16 fuglum. 13 af þeim veiddust fyrir Vesturlandi á grunnsævi þar sem 23% veiðinnar var.

Á fundinum ítrekaði LS kröfu sína um að Hafrannsóknastofnun mundi endurskoða skýrsluna á grunni nýrra upplýsinga sem komið hefðu fram.

Í lok fundar þakkaði ráðherra viðstöddum fyrir góða kynningu á viðfangsefninu og hvatti þá um leið til þess að ná saman um lausn í málinu.

Ljóst er að hraða þarf þeirri vinnu sem framundan er þar sem aðgerðarplan verður að liggja fyrir eigi síðar en 90 dögum (4. apríl) eftir að vottunin var felld úr gildi,“ segir á heimasíðunni.

 

Tengdar færslur

thumbnail
hover

Þrír bátar hafa náð 12 daga...

Að loknum 12 veiðidögum sem heimilt er að stunda strandveiðar í hverjum mánuði hafa þrír bátar náð að nýta alla dagana.  Gr...

thumbnail
hover

Sjávarútvegurinn er spennandi grein

Hún byrjaði að vinna við sjávarútveg sem krakki hjá föður sínum Karli Sveinssyni á Borgarfirði eystri í saltfiski. Hún reyndi ...

thumbnail
hover

Köflótt kolmunnaveiði

Venus NS kom til Vopnafjarðar í byrjun vikunnar með rúmlega 2.300 tonn af kolmunna sem fór til vinnslu hjá fiskmjölsverksmiðju HB Gr...