-->

Mjög góður gangur í veiðunum

„Það hefur verið mjög góður gangur í veiðunum, jafnt hjá frystitogurunum sem og ísfisktogurunum. Til marks um það get ég nefnt að frystitogararnir þrír voru með 1.200 milljón króna aflaverðmæti í júnímánuði og aflaverðmæti Örfiriseyjar RE í síðustu tveimur túrum, á alls 77 úthaldsdögum, nam einum milljarði króna.“

Þetta segir Birkir Hrannar Hjálmarsson, útgerðarstjóri togara HB Granda í samtali á heimasíðu félagsins. Að sögn Birkis voru bæði Örfirisey og Vigri RE að veiðum í Barentshafi en bæði skip fóru ekki þangað norður fyrr en eftir sjómannadaginn. Komið hefur fram á vefnum að það tók Vigra sex sólarhringa að komast á miðin þannig að skipin voru ekki nema um 20 daga á miðunum í júnímánuði. Höfrungur III AK var á sama tíma á heimamiðum og var aflinn að uppistöðu grálúða en einnig þorskur og ufsi. Heildarafli skipsins í síðasta túr var tæplega 600 tonn upp úr sjó.

,,Það hefur einnig gengið mjög vel hjá ísfisktogurunum. Við erum bara með tvo ísfisktogara í rekstri nú þegar Engey RE er farin og Helga María AK er í leiguverkefni á Grænlandi. Pressan á áhafnir Akureyjar AK og Viðeyjar RE er því meiri en ella en við erum búnir að stilla því þannig upp að ísfisktogararnir munu landa þrisvar sinnum í viku. Þeir voru með 1.550 tonna afla í júnímánuði og það verður ekkert slegið af í vinnslunni,“ segir Birkir Hrannar Hjálmarsson.

 

 

Tengdar færslur

thumbnail
hover

Flutningur hlutdeilda fyrir áramót

Um komandi  áramót lýkur veiðitímabili þeirra fisktegunda þar sem veiðitímabilið er almanaksárið. Þessar tegundir eru: Norsk-...

thumbnail
hover

Hertar kröfur um svartolíunotkun

Guðmundur Ingi Guðbrandsson, umhverfis- og auðlindaráðherra, hefur skrifað undir reglugerð um hertar kröfur varðandi eldsneyti í ...

thumbnail
hover

„Bak við yztu sjónarrönd“

Íslenski sjávarklasinn efndi til útgáfuhófs í Húsi sjávarklasans vegna útgáfu ritsins “Bak við yztu sjónarrönd” að viðst...