Orly-steiktur saltfiskur með súrsætri sósu

Lífið er saltfiskur. Það vita allir sem hafa lesið Sölku Völku, en sömuleiðis þeir sem þekkja fyrri tíma, þegar saltfiskur var undirstaðan í útflutningi þjóðarinnar og menn ræddu í alvöru um að hafa flattan þorsk í þjóðfána landsins. Svo mikils virði var saltfiskurinn þjóðinni. Hann er enn mikilvægur hluti af útflutningi fiskafurða frá landinu.
Af þessum mikla útflutningi lærðum við svo smám saman að elda saltfisk öðru vísi en að sjóða hann. Það lærðum við af kaupendum saltfisksins í Suður-Evrópu og var það löngu tímabært. Nú njótum við þess að borða hann sem veislumat til hátíðabrigða eða til að njóta á veitingahúsum eða í rólegheitum heima með glasi af góðu rauðvíni. Það gerum við þegar við teljum að við eigum eitthvað gott skilið og það er reyndar býsna oft.
Þessa uppskrift fundum við í bókinni Sælgæti úr sjó og vötnum og er uppskriftin frá Úlfari Eysteinssyni.

Innihald:

800 g útvatnaður saltfiskur, roð- og beinhreinsaður
hveiti
Orly-deig:
3 dl hveiti
1 egg
1 msk olía
2 msk vatn
½ tsk sykur
½ tsk salt
½ tsk paprikuduft
1 msk rifinn ostur
0,5 dl bjór
1 stífþeytt eggjahvíta

Súrsæt sósa:
2 dl sykur
2 dl vatn
2 dl vínedik
1 msk tómatkraftur
½ fínt saxaður laukur
1 fínt söxuð gulrót
1 msk japönsk sojasósa
½ tsk saxaður hvítlaukur
maísenamjöl
vatn

Aðferð:

Skerið saltfiskinn í ræmur, 1×3 sm.
Hrærið saman hveiti, eggi, olíu vatni, sykri, salti, paprikudufti, rifnum osti og bjór. Hrærið eggjahvítunni varlega saman við deigið.
Setjið í pott sykur, vatn, vínedik, tómatkraft, lauk, gulrót, hvítlauk og sojasósu. Sjóðið sósuna þar til gulrótin er orðin mjúk. Hrærið þá maísenamjöl út í vatni og jafnið sósuna með því.
Veltið saltfiskræmunum upp úr hveitinu og hristið allt laust hveiti af þeim.
Dýfið saltfiskræmunum í orly-deigið og djúpsteikið þær í 170 gráðu heitri olíu.

Tengdar færslur

thumbnail
hover

Hörpuskel með rísottó og spínati

Nú fáum við okkur veislumat. Hörpudisk með rísottó, spínati og brúnuðu smjöri. Þetta er kjörinn réttur fyrir hvers kyns hátí...

thumbnail
hover

Bakaður þorskur með límónusósu

Þorskur og aftur þorskur! Já, auðvitað því þorskurinn er úrvalds fiskur, sérstaklega ef hann er dreginn úr íslenskum sjó. Hér ...

thumbnail
hover

Grilluð lúða

Nú bjóðum við upp á uppskrift af grillaðri lúðu. Hana er yfirleitt hægt að fá í góðum fiskbúðum, þó beinar veiðar á lú...