Sjóflutningar hafa vinninginn

Fram kemur í nýbirtri samantekt og samanburði Hagstofu Íslands á losun koltvísýrings (CO2) að sjóflutningar eiga minnstan hlut í heildarlosun á Íslandi. Sú staðreynd kann að koma einhverjum á óvart, en endurspeglar um leið hversu vistvænir sjóflutningar eru í samanburði við aðra flutningsmáta í millilandaflutningum. Frá þessu er greint á heimasíðu Samskipa.

Um leið og flutningur varnings á milli landa er nauðsynleg innviðaþjónusta sem enginn getur verið án, taka Samskip alvarlega samfélagslega ábyrgð sína með virkum aðgerðum til að draga úr neikvæðum umhverfisáhrifum starfseminnar. Með fjölþátta gámaflutningskerfi sínu er Samskip leiðandi fyrirtæki þegar kemur að aðgerðum til að draga úr mengun og útblæstri. Stöðugt er leitað leiða til að minnka umhverfisáhrif starfseminnar.

Í samanburði á fraktflutningum í flugi og á sjó er þumalputtareglan sú að fyrir hvert flutt tonn af farmi eru gróðurhúsaáhrif flugsins um 15 sinnum meiri en skipsins. Samskip, sem meðal annars sérhæfa sig í kæliflutningum, leggja sig sérstaklega fram um að bjóða þeim þjónustu sem koma þurfa vöru sinni fljótt og örugglega á markaði í Evrópu og hafa endurskipulagt siglingakerfi sitt til að þjónusta betur viðskiptavini í kæliflutningum.

Samkvæmt losunarbókhaldi Hagstofunnar nam losun CO2 frá sjóflutningum 468,6 kílótonnum árið 2016, en næstminnst er losunin í þessari flokkun frá sjávarútvegi og matvælaframleiðslu, 505,8 kílótonn. Losun frá heimilum nemur 575 kílótonnum en langmest er losunin vegna einkennandi þátta ferðaþjónustu, 1987,4 kílótonn. Í þeirri tölu vega flugsamgöngur þyngst. Næst mesti útblásturinn er frá framleiðslu málma, 1.679,3 kílótonn, en fram kemur að greinar ferðaþjónustunnar hafi farið fram úr losun fyrirtækja í framleiðslu málma árið 2016.

 

Tengdar færslur

thumbnail
hover

Gylfi hættir sem forstjóri Eimskips um...

Stjórn Eimskipafélags Íslands hf. og forstjóri félagsins Gylfi Sigfússon hafa komist að samkomulagi um að Gylfi láti af störfum se...

thumbnail
hover

Flytur erindi um plast í þorski...

Föstudaginn 23. nóvember kl. 11:00 mun Anne de Vries flytja erindi á málstofu Hafrannsóknastofnunar. Erindið mun fjalla um mælingar A...

thumbnail
hover

Samdráttur í útflutningi frá Færeyjum

Útflutningur sjávarafurða frá Færeyjum dróst saman á fyrstu níu mánuðum ársins um 15% í verðmæti og 8% í magni. Heildarverðm...