Umfangsmiklar loðnurannsóknir að hefjast

Á næstu dögum fara rannsóknarskip Hafrannsóknastofnunar í einn umfangsmesta loðnuleiðangur síðari ára. Þá verður í fyrsta sinn farið til loðnuleitar í samstarfi við Grænlendinga. Markmiðið er meðal annars að átta sig betur á orsökum þeirra miklu breytinga sem orðið hafa á loðnunni og útbreiðslu hennar undanfarin ár samkvæmt frétt á ruv.is.

Bæði rannsóknarskip Hafrannsóknastofnunar, Árni Friðriksson og Bjarni Sæmundsson, taka þátt í þessum leiðangri sem hefst á fimmtudag, ásamt norsku skipi sem fjármagnað er af systurstofnun Hafró á Grænlandi.

Talsvert meiri rannsóknir en undanfarin haust 

Leiðangurinn verður talsvert umfangsmeiri en hefðbundnir loðnuleiðangrar að hausti síðustu ára. Auk vöktunar og mælinga á loðnustofninum til að meta hrygningastofn næstu loðnuvertíðar og magn af yngri loðnu, verða nú töluverðar viðbætur, að sögn Þorsteins Sigurðssonar, sviðsstjóra á sviði uppsjávarlífríkis hjá Hafrannsóknastofnun.

Telja og merkja hvali og fylgjast með fuglalífi

„Við verðum með ítarlegar hvalatalningar, við fylgjumst með fuglum, við verðum með rannsóknir á fæðusamspili loðnunnar við afræningja, við vonumst til að geta merkt nokkra hnúfubaka, við fylgjumst með lifrum. Þannig að það eru ýmis verkefni sem við erum að sinna umfram það sem við höfum getað gert á undanförnum árum,“ segir hann.

Vilja átta sig betur á orsökum breytinga hjá loðnunni 

Allt er þetta gert, segir Þorsteinn, til að geta áttað sig betur á orsökum þeirra breytinga sem hafa orðið á loðnunni og útbeiðslu hennar og til að skilja vistkerfið betur. Og það verður farið yfir stórt hafsvæði, langt norður fyrir Jan Mayen og hafsvæðið milli Íslands og Jan Mayen, auk þess stórt svæði við Austur-Grænland.

Samstarfið við Grænland stækki verkefnið verulega

„Það má segja að við höfum sem betur fer getað verið með fleiri daga okkar rannsóknarskipa núna á síðustu árum,“ segir Þorsteinn. „En síðan er það viðbótin sem kemur í raun frá systurstofnun okkar í Grænlandi sem gerir það að verkum að við getum núna bæði náð utan um megin verkefnið, sem er vöktunin, en bætt á það öðrum verkefnum sem við ella hefðum ekki getað gert.“

 

Tengdar færslur

thumbnail
hover

Venus á leið til Vopnafjarðar

Venus NS er nú á leið til heimahafnar á Vopnafirði með fyrsta kolmunnafarm ársins. Kolmunninn fékkst vestur af Írlandi en þaðan e...

thumbnail
hover

Drög að reglugerð um bann við...

Nú liggja fyrir á samráðsgátt stjórnvalda drög að reglugerð um bann við álaveiðum sem áformað er að setja. Markmið með setn...

thumbnail
hover

Kolmunna landað í Neskaupstað og á...

Norska skipið Manon kom til Neskaupstaðar sl. föstudag með 1.900 tonn af kolmunna. Í kjölfar hans kom síðan Börkur NK á sunnudagsm...